{א} מִזְמוֹר לְאָסָף, אַךְ טוֹב לְיִשְׂרָאֵל אֱלֹהִים לְבָרֵי לֵבָב:
{ב} וַאֲנִי כִּמְעַט (נטוי) נָטָיוּ רַגְלָי, כְּאַיִן (שפכה) שֻׁפְּכוּ אֲשֻׁרָי:
{ג} כִּי קִנֵּאתִי בַּהוֹלְלִים, שְׁלוֹם רְשָׁעִים אֶרְאֶה:
{ד} כִּי אֵין חַרְצֻבּוֹת לְמוֹתָם, וּבָרִיא אוּלָם:
{ה} בַּעֲמַל אֱנוֹשׁ אֵינֵמוֹ, וְעִם אָדָם לֹא יְנֻגָּעוּ:
{ו} לָכֵן עֲנָקַתְמוֹ גַאֲוָה, יַעֲטָף שִׁית חָמָס לָמוֹ:
{ז} יָצָא מֵחֵלֶב עֵינֵמוֹ, עָבְרוּ מַשְׂכִּיּוֹת לֵבָב:
{ח} יָמִיקוּ וִידַבְּרוּ בְרָע עֹשֶׁק, מִמָּרוֹם יְדַבֵּרוּ:
{ט} שַׁתּוּ בַשָּׁמַיִם פִּיהֶם, וּלְשׁוֹנָם תִּהֲלַךְ בָּאָרֶץ:
{י} לָכֵן (ישיב) יָשׁוּב עַמּוֹ הֲלֹם, וּמֵי מָלֵא יִמָּצוּ לָמוֹ:
{יא} וְאָמְרוּ אֵיכָה יָדַע אֵל, וְיֵשׁ דֵּעָה בְעֶלְיוֹן:
{יב} הִנֵּה אֵלֶּה רְשָׁעִים, וְשַׁלְוֵי עוֹלָם הִשְׂגּוּ חָיִל:
{יג} אַךְ רִיק זִכִּיתִי לְבָבִי, וָאֶרְחַץ בְּנִקָּיוֹן כַּפָּי:
{יד} וָאֱהִי נָגוּעַ כָּל הַיּוֹם, וְתוֹכַחְתִּי לַבְּקָרִים:
{טו} אִם אָמַרְתִּי אֲסַפְּרָה כְמוֹ, הִנֵּה דוֹר בָּנֶיךָ בָגָדְתִּי:
{טז} וָאֲחַשְּׁבָה לָדַעַת זֹאת, עָמָל (היא) הוּא בְעֵינָי:
{יז} עַד אָבוֹא אֶל מִקְדְּשֵׁי אֵל, אָבִינָה לְאַחֲרִיתָם:
{יח} אַךְ בַּחֲלָקוֹת תָּשִׁית לָמוֹ, הִפַּלְתָּם לְמַשּׁוּאוֹת:
{יט} אֵיךְ הָיוּ לְשַׁמָּה כְרָגַע, סָפוּ תַמּוּ מִן בַּלָּהוֹת:
{כ} כַּחֲלוֹם מֵהָקִיץ, אֲדֹנָי בָּעִיר צַלְמָם תִּבְזֶה:
{כא} כִּי יִתְחַמֵּץ לְבָבִי, וְכִלְיוֹתַי אֶשְׁתּוֹנָן:
{כב} וַאֲנִי בַעַר וְלֹא אֵדָע, בְּהֵמוֹת הָיִיתִי עִמָּךְ:
{כג} וַאֲנִי תָמִיד עִמָּךְ, אָחַזְתָּ בְּיַד יְמִינִי:
{כד} בַּעֲצָתְךָ תַנְחֵנִי, וְאַחַר כָּבוֹד תִּקָּחֵנִי:
{כה} מִי לִי בַשָּׁמָיִם, וְעִמְּךָ לֹא חָפַצְתִּי בָאָרֶץ:
{כו} כָּלָה שְׁאֵרִי וּלְבָבִי, צוּר לְבָבִי וְחֶלְקִי אֱלֹהִים לְעוֹלָם:
{כז} כִּי הִנֵּה רְחֵקֶיךָ יֹאבֵדוּ, הִצְמַתָּה כָּל זוֹנֶה מִמֶּךָּ:
{כח} וַאֲנִי קִרְבַת אֱלֹהִים לִי טוֹב, שַׁתִּי בַּאדֹנָי יֱהוִֹה [אומרים - אלוהים] מַחְסִי, לְסַפֵּר כָּל מַלְאֲכוֹתֶיךָ:
Extraído mediante autorização do livro
“SALMOS com TRADUÇÃO e TRANSLITERAÇÃO” da Editora Sêfer, Brasil.
Direitos reservados.
Pela elevação da alma de TSVI
IESHAIÁ BEN CHAYIM GITMAN FRIDLIN Z”L
לרפואת להצלחת נשיא ארצות הברית דונלד ג'ון בן פרד טרמפ בבחירות For the re-election of Donald Trump President of USA בתוך שאר חולי ישראל